विदेशमा कोरोना संक्रमणबाट एक सातामा १६ जनाको मृत्यु, मृत्यु हुनेको संख्या १६० पुग्यो

लेखाजोखा न्यूज

४ साउन २०७७, आइतबार १०:३०

काठमाडौं । एक सातामा कोरोना संक्रमणबाट खाडीका विभिन्‍न देशमा १६ जना नेपालीले ज्यान गुमाएका छन् ।

कतार, कुवेत र यूएईमा गरी एक हप्तामा १६ जना नेपालीको मृत्यु भएको गैरआवासीय नेपाली संघ (एनआरएनए) ले जनाएको छ।

संघको स्वास्थ्य समितिका अनुसार गएको साता कतारमा ८, कुवेतमा ३ र यूएईमा ५ जना नेपालीले कोरोना संक्रमणको कारण ज्यान गुमाएका हुन् ।

संघका स्वास्थ्य समितिका संयोजक डा.सञ्जिव सापकोटाका अनुसार कतारमा ज्यान गुमाउने आठमध्ये दुई जनाको मृत्यु अघि नै कोरोना पुष्टि भएको थियो भने बाँकी ६ जनाको मृत्युपछि मात्रै कोरोना पुष्टि भएको हो।

हालसम्म विश्वका विभिन्न १४ देशमा गरी १६० जना नेपालीको कोरोना संक्रमणको कारण मृत्यु भइसकेको एनआरएनएले जनाएको छ।

संघका अनुसार अहिलेसम्म विदेशमा रहेका ३० हजार ५ सय ७१ जना नेपालीमा कोरोना संक्रमण पुष्टि भएको छ । त्यसमध्ये २८ हजार ६ सय ८१ जना उपचारपछि निको भइसकेका छन् ।

विदेशमा मृत्यु भएका १६० जनामध्ये १०७ नेपालीको शव विदेशमै रहेको छ । अन्तर्राष्ट्रिय उडानमा प्रतिबन्ध लगाइएका कारण शव ल्याउन समस्या भएको जनाइएको छ ।