प्रधानमन्त्रीको कार्यव्यस्तताका कारण मन्त्रिपरिषद् बैठक स्थगित

प्रधानमन्त्रीको कार्यव्यस्तताका कारण मन्त्रिपरिषद् बैठक स्थगित

भोलि बस्ने बैठकले विद्युत प्राधिकरणका कार्यकारी निर्देशक नियुक्त गर्ने, सरकारका प्रवक्ता पनि तोकिने सम्भावना

लेखाजोखा न्यूज

२५ भाद्र २०७७, बिहिबार १२:४५

काठमाडौं । नेपाल विद्युत प्राधिकरणको कार्यकारी निर्देशक नियुक्तिबारे निर्णय गर्न बोलाइएको मन्त्रिपरिषद् बैठक स्थगित भएको छ ।

प्रधानमन्त्री केपी शर्मा ओली सत्तारुढ नेपाल कम्युनिस्ट पार्टी (नेकपा) को शुक्रबार बस्ने स्थायी कमिटी बैठकको तयारीमा व्यस्त भएका कारण बिहीबार बस्ने भनिएको मन्त्रिपरिषद् बैठक स्थगित भएको हो ।

बिहीबार साँझ बोलाइएको मन्त्रिपरिषद् बैठकले विद्युत प्राधिकरणको कार्यकारी निर्देशक नियुक्ति गर्ने बताइएको थियो ।

ऊर्जा जलस्रोत तथा सिंचाई मन्त्री वर्षमान पुनले प्राधिकरणको कार्यकारी निर्देशक नियुक्तिका बारेमा यसअघि नै मन्त्रिपरिषद् बैठकमा छलफल गरिसकेका छन् ।

बिहीबार स्थगित भएको मन्त्रिपरिषद् बैठक शुक्रबार बस्ने भएको छ । बैठकले सरकारको प्रवक्ता तोक्ने र केही मुलुकका लागि राजदूत सिफारिस गर्ने पनि बताइएको छ ।