कांग्रेस बैठक जारी, महाधिवेशन प्रस्तावित कार्यतालिकामा छलफल हुँदै

लेखाजोखा न्युज
४ असार २०७८, शुक्रबार १७:०६

काठमाडौं। नेपाली कांग्रेस केन्द्रीय कार्य समितिको बैठक पार्टी कार्यालय सानेपामा जारी छ। तोकिएको समयभन्दा ढिलो गरी बसेको बैठकमा महामन्त्री पूर्णबहादुर खड्काले १४औं महाधिवेशनका लागि संशोधित कार्यतालिका प्रस्तुत गरेका छन।

बैठकमा १४ औं महाधिवेशनको कार्यतालिका अनुमोदनका लागि छलफल भइरहेको बताइएको छ। कांग्रेसले आगामी भदौ १६ गतेदेखि १९ गतेसम्म काठमाडौंमा १४ औं महाधिवेशन गर्ने लागेको छ। प्रस्तावित कार्यतालिकामा साउन १२ गते वडा अधिवेशन, १६ गते गाउँ तथा नगर अधिवेशन र साउन २० गते प्रदेश क्षेत्रीय अधिवेशन गर्ने उल्लेख छ।

त्यस्तै प्रतिनिधिसभा क्षेत्रीय अधिवेशन र एक मात्र प्रतिनिधिसभा निर्वाचन क्षेत्र भएको जिल्लाको अधिवेशन साउन २३ गते र दुईभन्दा बढी निर्वाचन क्षेत्र भएका जिल्लाको अधिवेशन साउन २६ गते गर्ने पनि प्रस्तावमा उल्लेख छ। प्रदेश अधिवेशन भदौ १ र २ गते हुने गरी कार्यतालिका बनाइएको छ क्रियाशील सदस्यता टुंग्याउन असार मसान्तसम्मको समय दिने प्रस्ताव पनि गरिएको छ।