२४ माघ २०७९, मंगलबार

सूर्य नेपाल गल्फ टुरको उपाधिका लागि रमेश र दिनेश भिड्ने

लेखाजोखा न्यूज

११ माघ २०७९, बुधबार ७:२९

काठमाडौं । सूर्य नेपाल गल्फ टुर २०२२/०२३ अन्तर्गत सिजनको तेस्रो प्रतियोगिता सूर्य नेपाल एनपिएजिए म्याच प्लेको उपाधिका लागि दिनेश प्रजापति र रमेश अधिकारीबीच प्रतिस्पर्धा हुने भएको छ ।

बुधबार रोयल नेपाल गल्फ क्लवको कोर्समा भएको अन्तिम चारको भिडन्तमा १३ औं वरियताका रमेश अधिकारीले १० औं वरियताका भुवन कुमार रोक्कालाई २/१ ले हराउँदै फाइनलमा स्थान पक्का गर्दा अर्को खेलमा सातौं वरियताका दिनेश प्रजापतिले आठौं वरियताका धनबहादुर थापालाई पनि २/१ ले पछि पार्दै फाइनलमा स्थान बनाएका हुन् ।

सूर्य नेपाल टुरमा करियरकै पहिलो उपाधि जित्ने दाउमा रहेका दिनेश अब मात्र एक कदम टाढा रहेका छन् । दिनेश र रमेशले उपाधिका लागि बिहीवार ३६ होलमा गर्नेछन् भने धन र भुवनले तेस्रो स्थानका लागि १८ होलका लागि प्रतिष्पर्धा गर्नेछन् ।

यसअघि बुधबार नै भएको अर्को क्वाटरफाइनलमा नेपाल नम्बर एक खेलाडी शुक्रबहादुर राई, दोस्रो वरियताका भुवन नगरकोटी, तेस्रो वरियताका जयराम श्रेष्ठ र पाँचौ वरियताका रवि खड्का पराजित भए ।

शुक्रलाई वरियताको १० औं स्थानमा रहेका भुवनकुमार रोक्काले ३/१ ले पराजित गरे । अर्को क्वाटरफाइनलमा धनबहादुर थापाले भुवनलाई ३/२ ले हराउँदै अन्तिम चारमा स्थान बनाएका थिए । यसैगरी दिनेश प्रजापतीले तेस्रो वरियताका जयराम श्रेष्ठलाई ३/२ ले स्तब्ध बनाए ।

पूर्व नम्बर एक खेलाडी रवि खड्कालाई १३ औँ वरियताका रमेश अधिकारीले पराजित गरे । रमेशले पाँचौं वरियताका रविलाई ३/२ को नतिजामा पराजित गरेका हुन् ।

गत सिजनको उत्कृष्ट १६ प्रोफेसनल गल्फरले प्रतियोगितामा भाग लिने भएपनि चार खेलाडी देश बाहिर रहेकोले उत्कृष्ट २० सम्मका खेलाडीले मौका पाएका हुन् ।

सूर्य नेपाल प्रालिको प्रायोजनमा पीजीए नेपालले आयोजना गरेको प्रतियोगितामा सबै स्पर्धाका विजेताले कुल २ लाख ५० हजार रुपैयाँ राशिको पुरस्कार पाउनेछन् ।

प्रतिक्रिया
सम्बन्धित समाचार
© 2023 All Rights Reserved - Lekhajokha News Site By : SobizTrend